(ក្រុងប៉េកាំង)៖ ប្រទេសចិនបានចេញសេចក្តីថ្លែងការណ៍រួមគ្នាជាមួយប្រទេសមីយ៉ាន់ម៉ាបន្ទាប់ពីកិច្ចប្រជុំរវាងមេដឹកនាំរបស់ពួកគេកាលពីដើមសប្តាហ៍នេះនៅទីក្រុងប៉េកាំង ដោយបញ្ជាក់ថាប្រទេសទាំងពីរនឹងបន្តគាំទ្រគ្នាទៅវិញទៅមកនៅក្នុងវិស័យដែលជាផលប្រយោជន៍ស្នូល និងជាកង្វល់ចម្បង។​ នេះបើយោងតាមអង្គភាពរ៉យទ័រចេញផ្សាយនៅថ្ងៃទី១៧ ខែមិថុនានេះ។​

ប្រទេសចិនបានស្វាគមន៍ការបោះឆ្នោតទូទៅនៅក្នុងប្រទេសមីយ៉ាន់ម៉ា និងបានបញ្ជាក់ជាថ្មីនូវការគាំទ្រចំពោះការព្យាយាមរបស់ប្រទេសមីយ៉ាន់ម៉ាក្នុងការជំរុញសន្តិភាព ស្ថិរភាព និងការអភិវឌ្ឍប្រកបដោយចីរភាពនៅក្នុងប្រទេស។

ភាគីទាំងពីរបានបញ្ជាក់ជាថ្មីថាគ្មានប្រទេសណាមួយនឹងអនុញ្ញាតឱ្យទឹកដីរបស់ខ្លួនត្រូវបានប្រើប្រាស់សម្រាប់សកម្មភាពដែលបង្កគ្រោះថ្នាក់ដល់ផលប្រយោជន៍សន្តិសុខរបស់គ្នាទៅវិញទៅមកនោះទេ។​ ប្រទេសជិតខាងបានសន្យាថានឹងលើកកម្ពស់ការអនុវត្តច្រករបៀងសេដ្ឋកិច្ចចិន-មីយ៉ាន់ម៉ា និងជំរុញកិច្ចសហប្រតិបត្តិការលើគម្រោងធំៗដូចជាកំពង់ផែទឹកជ្រៅ Kyaukpyu និងផ្លូវដែក Muse-Mandalay។

លើសពីនោះ ភាគីទាំងពីរក៏បានព្រមព្រៀងគ្នាក្នុងការពង្រឹងកិច្ចសហប្រតិបត្តិការក្នុងការរុករករ៉ែ សេដ្ឋកិច្ចឌីជីថល បញ្ញាសិប្បនិម្មិត និងកសិកម្ម ក្នុងចំណោមវិស័យផ្សេងៗទៀត ដើម្បីប្រើប្រាស់បំពង់បង្ហូរប្រេង និងឧស្ម័នចិន-មីយ៉ាន់ម៉ា និងជំរុញការតភ្ជាប់បណ្តាញអគ្គិសនី។

ទន្ទឹមគ្នានេះ ទីក្រុងប៉េកាំងក៏បានគូសបញ្ជាក់ប្រាប់ថា ខ្លួនគាំទ្រប្រទេសមីយ៉ាន់ម៉ាក្នុងការជំរុញដំណើរការសន្តិភាពក្នុងស្រុក និងការផ្សះផ្សាតាមរយៈការសន្ទនានយោបាយ និងគាំទ្រ «ការចូលរួមពេញលេញ ស្មើភាព និងស្ថាបនា» របស់ខ្លួននៅក្នុងអាស៊ាន និងអង្គការសហប្រជាជាតិ ដើម្បីការពារផលប្រយោជន៍របស់ខ្លួន៕