អាម៉េរិក និងអ៊ីរ៉ង់ ឈានដល់កិច្ចព្រមព្រៀងបឋមដើម្បីបញ្ចប់សង្គ្រាម ខណៈការចុះហត្ថលេខានឹងត្រូវនៅថ្ងៃសុក្រ ប្រទេសស្វីស

(ឌូបៃ/វ៉ាស៊ីនតោន)៖ មន្ត្រីសហរដ្ឋអាម៉េរិក និងអ៊ីរ៉ង់ថាពួកគេបានព្រមព្រៀងគ្នាលើក្របខ័ណ្ឌមួយដើម្បីបញ្ចប់សង្គ្រាម បញ្ឈប់ការបិទផ្លូវអ៊ីរ៉ង់ និងបើកច្រកសមុទ្រហ័រមូសឡើងវិញ ដែលជាកតិកាសញ្ញាបឋមដែលបានធ្វើឱ្យតម្លៃប្រេងធ្លាក់ចុះ ប៉ុន្តែជោគវាសនានៃកម្មវិធីនុយក្លេអ៊ែររបស់អ៊ីរ៉ង់ត្រូវទុកចរចាដាច់ដោយឡែក។ នេះបើយោងតាមអង្គភាពរ៉យទ័រចេញផ្សាយនៅថ្ងៃទី១៥ ខែមិថុនានេះ។

ប្រធានាធិបតីសហរដ្ឋអាមេរិក ដូណាល់ ត្រាំ បានសរសេរនៅលើវេទិកា Truth Social របស់លោកថា «កិច្ចព្រមព្រៀងជាមួយសាធារណរដ្ឋអ៊ីស្លាមអ៊ីរ៉ង់ឥឡូវនេះបានបញ្ចប់ហើយ»។ ការបង្ហោះរបស់លោកបានកើតឡើងភ្លាមៗបន្ទាប់ពីនាយករដ្ឋមន្ត្រីប៉ាគីស្ថាន សេបាស សារីហ្វ ដែលលោកបានធ្វើជាអ្នកសម្របសម្រួល បានប្រកាសថាកិច្ចព្រមព្រៀងមួយត្រូវបានធ្វើឡើងនៅព្រឹកថ្ងៃចន្ទនេះ។

យ៉ាងណាក៏ដោយ អនុស្សរណៈនៃការយោគយល់គ្នានេះ គ្រោងនឹងចុះហត្ថលេខាជាផ្លូវការនៅថ្ងៃសុក្រ នៅប្រទេសស្វីស។

លក្ខខណ្ឌពិតប្រាកដមិនទាន់ត្រូវបានគេដឹងភ្លាមៗនោះទេ។ លោក Sharif បានលើកឡើងថា កតិកាសញ្ញានេះបានអំពាវនាវឱ្យមានការបញ្ចប់ប្រតិបត្តិការយោធាជាបន្ទាន់ និងជាអចិន្ត្រៃយ៍លើគ្រប់វិស័យ រួមទាំងនៅក្នុងប្រទេសលីបង់ផងដែរ។

ប្រទេសលីបង់គឺជាចំណុចជាប់គាំងក្នុងការចរចា ដោយអ៊ីស្រាអែល និងហេសបូឡា មិនអើពើនឹងការអំពាវនាវពីលោក Trump និងអ្នកដទៃទៀតឱ្យបញ្ឈប់ការវាយប្រហាររបស់ពួកគេទៅលើគ្នាទៅវិញទៅមកក្នុងរយៈពេលប៉ុន្មានសប្តាហ៍ថ្មីៗនេះ។

ជោគវាសនានៃកម្មវិធីនុយក្លេអ៊ែររបស់អ៊ីរ៉ង់ ដែលជាបញ្ហាដ៏ស្មុគស្មាញមួយទៀត ក៏នឹងត្រូវដោះស្រាយនៅក្នុងកិច្ចពិភាក្សានៅពេលក្រោយផងដែរ។ ទន្ទឹមគ្នានេះ មិនមានប្រតិកម្មភ្លាមៗចំពោះការប្រកាសនេះពីអ៊ីស្រាអែលនោះទេ ខណៈខ្លួនមិនមែនជាភាគីនៃកិច្ចចរចារវាងសហរដ្ឋអាមេរិក និងអ៊ីរ៉ង់៕

ដោយ៖ ចិន្តា ទីទិ