វិទ្យាសាស្រ្ត និងបច្ចេកវិទ្យា
ក្រុមហ៊ុន Huawei និងវិទ្យាស្ថានបច្ចេកវិទ្យាកម្ពុជា ចុះអនុស្សារណៈនៃការយោគយល់គ្នា ដើម្បីពង្រឹងការអភិវឌ្ឍន៍ទេពកោសល្យ ICT
ទីក្រុងសៀងហៃ៖ ថ្ងៃទី ២០ ខែកញ្ញា ឆ្នាំ ២០២៥ ក្រុមហ៊ុន Huawei និងវិទ្យាស្ថានបច្ចេកវិទ្យាកម្ពុជា (ITC) បានចុះហត្ថលេខាលើអនុស្សរណៈនៃការយោគយល់គ្នា (MOU) ក្នុងអំឡុងពេលព្រឹត្តិការណ៍ Huawei Connect 2025 ដែលប្រព្រឹត្តិទៅនៅទីក្រុងសៀងហៃ ដើម្បីធ្វើកិច្ចសហប្រតិបត្តិការជាមួយគ្នាលើវិស័យបច្ចេកវិទ្យា។
ពិធីចុះហត្ថលេខានេះ មានការចូលរួមពី សាស្ត្រាចារ្យបណ្ឌិត ប៉ូ គឹមថូ អគ្គនាយក ITC លោក Tao Guangyao ប្រធាន Huawei Southeast Asia Multi-Country Region និងជានាយកប្រតិបត្តិ Huawei Cambodia ។
MOU ក្រុមហ៊ុន Huawei និង ITC នឹងពង្រឹងកិច្ចសហប្រតិបត្តិការក្នុងការជំរុញការអប់រំ ICT និងបណ្តុះជំនាញផ្នែកឌីជីថលនៅកម្ពុជា។ ភាគីទាំងពីរមានគោលដៅបង្កើនលទ្ធភាពដើម្បីបណ្តុះអ្នកដឹកនាំបច្ចេកវិទ្យាជំនាន់ក្រោយ និងគាំទ្រដំណើរផ្លាស់ប្តូរឌីជីថលរបស់កម្ពុជា។
សាស្ត្រាចារ្យបណ្ឌិត ប៉ូ គឹមថូ សរសើរចំពោះការបន្តគាំទ្ររបស់ Huawei និងលើកឡើងថា ភាពជាដៃគូតំណាងឱ្យជំហានឆ្ពោះទៅមុខដ៏សំខាន់នៅក្នុងបេសកកម្មរបស់ ITC ក្នុងការផ្តល់នូវការអប់រំប្រកបដោយគុណភាពខ្ពស់ និងឱកាសសហប្រតិបត្តិការអន្តរជាតិសម្រាប់និស្សិតថ្នាក់មហាវិទ្យាល័យ។
លោក Tao Guangyao បានលើកឡើងពីការប្តេជ្ញាចិត្តយូរអង្វែងរបស់ក្រុមហ៊ុន Huawei ក្នុងការកសាងប្រព័ន្ធអេកូឡូស៊ី ICT នៅក្នុងតំបន់អាស៊ីអាគ្នេយ៍ ហើយបានសង្កត់ធ្ងន់លើការយកចិត្តទុកដាក់របស់ក្រុមហ៊ុនក្នុងការគាំទ្រគំនិតផ្តួចផ្តើមអភិវឌ្ឍន៍ទេពកោសល្យរបស់កម្ពុជា តាមរយៈភាពជាដៃគូជិតស្និទ្ធជាមួយសាកលវិទ្យាល័យឈានមុខដូចជា ITC ជាដើម។
អនុស្សារណៈនេះគឺជាការបញ្ជាក់ជាថ្មី និងច្បាស់លាស់អំពីចក្ខុវិស័យរួមគ្នារបស់ភាគីទាំងពីរក្នុងការលើកកម្ពស់ការច្នៃប្រឌិត ការអប់រំ និងកិច្ចសហប្រតិបត្តិការយូរអង្វែង៕